پرانڑے زمانے دی گال اے کولمبس نامی ھک چھوھر جیڑھا جو انگریزاں دے ملک راھندا تے انگریزی بولیندا ھا.آپنے ابے دا شروع کنوں تریجھا تے اماں دا چھیکڑ کنوں پہلا پتر ھا.کولمبس دا پیو جیڑھا جو قوم دا داد پوترا ھا سارا ڈینہہ مساگ وچیندا تے شام کوں موڑی گھر چا تے ولدا ھا.اوندی ماء ھی لوکیں دے پیسیں نال کمیٹیاں پا تے گھر دا سرکل چلائی کھڑی ھئی.گھر دے حالات بہوں خراب ھن.اتنی غریبی دے عالم اچ وی کولمبس دا مزاج دبئی دے شیخیں وانگ ھا.جیلھے ڈیکھو ڈیٹی ڈنہ کھیڈدا ودے یا زنانے سکول دے باھروں کھڑے یا ول علاقے پھردا ودے..سارا گھر اوندیں انہاں حرکتیں توں پریشان ھا..کولمبس دے پیو کوں یکا ایہو ڈر رہ ویندا ھا جو اوندا پتر کڈاھیں جیمز تھامس دی نال رانجھے آلی کار سچا عشق نہ لڑا کھڑے..اوندا پیو تاں چاھندا ھا جو کولمبس ویلڈنگ دا کم سکھ تے بغیر پڑھیے انجینئر سڈیجے.مگر تھیندی تاں اوھا ھئی جیڑھی مقدروں لکھی ھئی.
.
ھک ڈینہہ کولمبس آپنے سوتر نال سمندر دے کنارے ڈیٹی ڈنہ کھیڈدا ودا ھا.کولمبس دے سوتر ڈیٹی گد اچ رکھ تے ٹل بنڑا تے جو شاھد آفریدی وانگوں اوچا شاٹ ماریا ڈیٹی ادھ سمندر پار ھک جزیرے اچ ونج پئی..کولمبس روونڑ پئے گیا .اونکوں تاں ایہ ڈیٹی سکی ماء توں زیادہ تے ھوون آلی ذال جتنی پیاری ھئی..او تاں رات کوں وی ھیں ڈیٹی کوں سراندی رکھ سمدا ھا..کولمبس اتھائیں کھڑتے عہد چا کیتا جو جتنے تونڑی ڈیٹی نی لبھدی او چھوٹی شادی کیناں کریسے..جوش دی کیفیت اچ کولمبس دی نگاہ سونہانجڑیں دے ھک موٹے دگے تے ونج پئی..اوں او دگا سمندر اچ سٹیا تے خود اتے چڑھ بیٹھا .تھباکے مریندیں تراۓ ڈینہہ دے سفر دے بعد کولمبس ھوں جزیرے ونج پناں جتھاں ڈیٹی پئی ھئی.
.
جزیرے پج تے کولمبس کیا ڈھدے بارھاں فٹ لمبا کالا توت بندہ ادھی ڈیٹی سدھی زمین اچ پور شت آلا پاسا اتے کر تے ڈیٹی تے باھندا پے..
کولمبس دھاڑ دھاڑ گھت ڈتی....او میاں ایہ کیا پیا کریندیں .ایہ شودی تاں کھیڈن دی شئے ھے اینکوں تاں گناھیں و چ نہ بوڑو..او بندہ ایندی گال کتھوں سمجھدا ھا. او ول اینویں کرنڑ پیا تاں کولمبس کوں ایہ سدھ پئی اوں جموں دے ونڑ تے بیٹھی پہاڑی ماکھی کوں وٹا مار ڈتا..کالا توت دھاڑ دھاڑ کریندا بھج گیا..کولمبس ڈیٹی چا تے سمندر اچ چھال مار ڈتی.تردیں بڈدیں تھباکے مریندیں ھوں دگےکوں ونج پکڑیس تے 3 ڈینہہ بعد آپنے گھر آلے بنے آن لگیا.
.
گھر جیلھے پجدے تاں گھر آلے سارے اوندے کیتے پریشان ھن .امدا ڈیکھ سارے خوش تھی گے .ھک ڈینہہ ھک رات سمنڑ دے بعد کولمبس کوں کجھ ھوش ولیا ول سارا ماجرا سنڑایس..سارے حیران ھن جو ایں دنیا تے بی وی کوئی جاہ ھے جتھ لوک وسدن.
.
ایں موقعے تے کولمبس دی ماء آپنے گھر آلے کوں آکھیا بھلا تھیوی اتھ آپنڑاں گزارہ اوکھا ھے .کمیٹیں آلی چلاکی عوام سمجھ گئی اے کیوں نہ ایہ کم نویں جزیرے تے کیتا ونجے..شاید اتھ بخت کھل پووے..کجھ سوچنڑ دے بعد کولمبس دے پیو آکھیا ٹھیک اے.جتھ روزی اوھو وطن..تیاری کرو سویرے جولدے ھیں .نویں علاقے دی وی چس چا ڈیکھوں.
.
سویر تھئی ذال پئے،ترائے بال،چار بکریں سمیت ھک رچھ دا بچہ تے کبوتریں دا کھوکھا ریڑھی تے لڈ تے سمندر دے کنارے پج گئے.کرایہ مکیندیں چکیندیں اوڑک ھک مہانڑے نال ایہ طے تھیا جو ڈوں روپے ھک بکری تے پندھراں کبوتر ڈیسوں تے مرضی دے علاقے پچا اوسیں..مک چکا دے بعد سامان بیڑی اچ سٹ تے سفر شروع کرڈتا گیا.
.
کولمبس رستہ ڈسیندا ریہا تے مہانڑاں بیڑی ٹوریندا ریہا..ڈوں ڈینہہ دے سفر دے بعد بیڑی ھوں جزیرے دا بنناں آن لگی.مہانڑے کوں کرایہ ڈے روانہ کر تے کولمبس دے پیو فیصلہ کیتا رات اتھائی راھندے ھیں سویرے اگی تے سفر کریسوں.
.
بے ڈینہہ جیلھے ایہ لوک جزیرے اچ داخل تھیندن تاں ڈیکھ تے حیران رہ ویندن جو اتھائی کوئی ھک بندہ کالا نہ ھا بلکہ پوری دی پوری برادری کالی ھئی..ھکو قالب اے.دماغوں پیدل ھن.کہیں کوں وی بولنڑ دی تمیز کئنی..بھولے اتنے جو کیلا چاہ اچ بوڑ تے کھاندن.
کولمبس دے پیو آکھیا تہاں ھک گال تے غور کیتے.سارے بھولے،آلسی تے رنیں دے شوقین لگدن.آپاں طریقے نال چلوں تاں بہوں جلد انہاں دے بادشاہ ھوسوں.ھیں گال تے سبھے ٹہکارے مار تے کھلنڑ پئے گے

بس ھوں ڈینہہ دے بعد انہاں لوکیں رچھ دے تماشے ڈیکھالنڑ تے کبوتریں دی اوڈار تے لوکیں کوں حیران کرن آلا کم شروع کر ڈتا.کولمبس رچھ دے کرتب ڈیکھاوے ھا اوندا پیو ٹکٹاں ویچے ھا تے باقی ڈوں بھرا ھوناں مجمیاں وچ لوکیں دیاں جیباں کٹ تے پیسہ جمع کرن ھا.کولمبس دی ماء نیڑے دیں وستیں وچ کمیٹیاں پاونڑ شروع کر ڈتا..ایں طرحاں نال ایہ لوک کجھ سالیں اچ امیر تھی گئے .امیر تھیون دے بعد باقی کم چھوڑ تے سود چلاون شروع کرڈتا تے ھولے ھولے پورے ملک کوں قرضائی کر تے ملک کالا شاہ کاکو دے بادشاہ بن گے..
پہلا بادشاہ کولمبس کوں بنڑایا گیا.شروع اچ ٹھیک راھنڑ دے بعد کولمبس وی ذرداریں،لغاریں تے مخدومیں آلا کم شروع کر ڈتا .جعلی ڈگریں والے وزیر لگنڑ پئے گے.
ھر پاسے بکھ راج کرن پئے گی مقامی نوجوان ایم اے کر تے وی ریڑھیاں لاونڑ تے مجبور تھی گے .ھیں دوران کولمبس آپنے پچھلے ملک وچوں اینویں بندے سڈواونڑ پئے گیا جیویں کوئی آرائیں سعودی پیر جماونڑ دے بعد باقی خاندان کوں سڈویندے.
.
عوام تے ظلم کرن تے شاید کہیں مظلوم دی پٹ لگی ھوسی جو پہلے کولمبس دا پیو فوت تھی گیا ول مہینے بعد اماں فوت تھی گی..ماء دی کل خوانی آلے ڈینہہ کولمبس کوں اوندے پچھلے وطن توں بھیجیا گیا خط ملدے.خط اچ لکھیا ھا .کولمبس تیڈے کیتے بری خبر ھے .تیڈی معشوق چاچے جیمز تھامس دی دھی امریکہ فوت تھی گئی اے.بس ایہ سنڑدا گیا تے کولمبس تے سکتہ طاری تھی گیا.
ماء پیو دا ڈکھ شاید برداشت تھی ونجے ھا پر معشوق دا ڈکھ تاں کولمبس دیں گوڈیں اچ بیھ گیا .ڈینہو ڈینہہ بیمار تھیندا گیا تے اوڑک مہینے بعد فوت تھی گیا.
.
کولمبس دی فوتگی دیاں خبراں پوری دنیا اچ کھنڈ گیاں .جیو تے پٹیاں چلنڑ پے گیاں..ملکیں دے بادشاہ ارمان کیتے جمع تھی گے .پاکستاں توں ڈوں سو وزیریں دا وفد سرکاری خرچے تے ارمان کیتے پج گیا.
.
جیلھے کولمبس دا یادگار ورتاوے دا سامان سنبھالنڑ دا ویلھا آلا تاں سئیں دیاں جیباں پھرولیا ں گیاں .لوک حیران ھن جیب وچوں ھک کاغذ ،پٹھانے خان دی آڈیو کیسٹ تے اوھا ڈیٹی نکتی جیندے پچھوں سئیں ایں جزیرے تئیں آئے ھن..کاغذ کھولیا گیا تاں لکھیا ھا. ایہ میڈی آخری خواھش ھے جیڑھا نہ منیسی او حرام دا ھوسی..خواھش ایہ ھے جو ایں ملک دا ناں کالا شاہ کاکو توں بدل تے میڈی معشوق دے ناں تے امریکہ رکھ ڈتا ونجے..خواھش دی تکمیل کوں فرض سمجھ تے پورا کر ڈتا گیا.
.
کولمبس دے مرنڑ دے بعد مقامی لوکیں سر چاونڑ شروع کر ڈتا ھر پاسے احتجاج کیتے گے .وائیٹ ھاوس دے اگوں ٹیر ساڑیے گے .حکومت جیلھے انہاں دا زور نہ تروڑ سگی تاں مجبورن ھر شعبے اچ کالیں کوں کوٹے ڈیونڑ دا اعلان کر ڈتا گیا..ایں فیصلے دے بعد دنیا حیران ھئی جو امریکہ دیں فلمیں وچ وی سوھنڑیں ھیروائناں نال کالے ھیرو آونڑ پئے گے تے اج تاں ایہ حال اے جو جیویں مکان تے کالی دیگڑی رکھی ھوندی اے اونویں امریکہ دا صدر....اگوں آپ سمجھدار ھو سمجھ ونجو..
.
.
ایں کہانی دے بعد ھک گال میکوں ڈاڈھا پریشان کیتے .اگر امریکہ کہیں دی معشوق دا ناں ھا تاں کیا سری لنکا، فلسطین تے بحرین وی کہیں دیں معشوقیں دے ناں ھوسن یا میں بھلداں..

لکھاری :۔ شعیب نواز جتوئی