وہ نیکی بڑی معتبر ہے جس کا رب کے سوا کوئی گواہ نہ ہو ..

 

جو زندہ ہیں ان میں کسی میں انسانیت ہے اور کوئی انسانیت سے خالی ہےاور جو انسانیت سے خالی ہے وہ مردہ ہے کیونکہ ایک لاش ہی انسانیت سے خالی ہوتی ہے۔

 

جب ہم کوئی تجارت کرتے ہیں تو اس میں لگے سرمائے کا پورا خیال رکھتے ہیں کہ کہیں کوئی نقصان نہ ہو جائے جبکہ اس تجارت میں اگر نقصان ہو بھی جائے تو پورا کیا جاسکتا ہے۔
اسی طرح ہماری زندگی بھی ایک تجارت ہے جس کا سرمایہ وقت ہے لیکن اس وقت کی ضیاع کا ہم کوئی خیال نہیں رکھتے جبکہ یہ ایسا نقصان ہے جس کا پورا ہونا ممکن نہیں۔
اس لئے وقت کی قدر کیجئے!

 

سچائی کو اپنا غلام بنانے کے بجائے ‘ سچائی کا غلام بن جائیے۔

 

مسلمانوں کی غیرت تو کب کی مر چکی ہے‘
بس دفن کرنا باقی ہے۔

 

پہلے لوگ اسلام کے احکام سن کر یا پڑھ کر اس پر عمل کرتے تهے‘
اب فیس بک‘ واٹس اپ‘ ٹویٹر‘ انسٹا گرام وغیرہ پر شیئر اور فارورڈ کرتے ہیں۔

 

مٹی کے انسان کو مٹی کے قریب رہنے میں ہی خیر ہے۔
کیونکہ مٹی سے اوپر ہوتے ہی وہ شرارت ا و رتکبر کرنے لگتا ہے‘ اپنے جسم پر قیمتی کپڑے چڑھا کر وہ اِترانے لگتا ہے اور جیب میں مال آتے ہی وہ شرکش ہو جاتا ہے۔

 

چھوٹے لوگوں کی نگاہ میں چھوٹی چیزیں بھی بڑی ہوتی ہیں‘ جبکہ بڑے لوگوں کی نگاہ میں بڑی چیزیں بھی چھوٹی ہوتی ہیں۔
۔۔۔ اس لئے بڑے لوگوں کی صحبت میں بیٹھنے والا اپنی بڑی چیزوں کی وقعت بھی کھو دیتا ہے۔

 

دنیا میں ہم جنت کی باتیں کم اور جہنم کی باتیں زیادہ کرتے ہیں‘ اور یوں اپنی اور دوسروں کی دنیا کو جہنم بناتے رہتے ہیں۔

 

نیپولین بوناپارٹ نے کہا تھا:
’’ مجھے تعلیم یافتہ ماں دو ! میں تم سے ایک تہذیب یافتہ ، تعلیم یافتہ قوم کی پیدائش کا وعدہ کرتا ہوں‘‘
لیکن آج ایک تعلیم یافتہ ماں کسی کارپوریٹ ادارے کی زینت بننا پسند کرتی ہے اور ان کے بچے غیر تعلیم یافتہ ہاؤس میڈ یا آیا کی پرورش میں ہوتی ہے ۔
پھر ایک تہذیب یافتہ ، تعلیم یافتہ قوم کی پیدائش کا وعدہ کہاں پورا ہو؟

 

دنیا میں ہر سمجھدار مرد ا پنی بیوی سے سب سے زیادہ محبت کرنے والا ہوتا ہے
جیسا کہ رسول اللہ ﷺ حضرت عائشہ ؓ سے سب سے زیادہ محبت کرتے تھے۔
(محمد اجمل خان )

 

رب کے سامنے بہائے آنسو کا ایک قطرہ کسی کو جنت میں اور کسی کو جہنم میں ڈالنے کا باعث بنتا ہے۔

 

ہم دس روپے کا نوٹ گر جانے یا جل جانے کو توخسارہ سمجھتے ہیں
لیکن
دس منٹ غفلت میں گزرنے جانے کو خسارہ نہیں سمجھتے‘ جب کہ ایک کی تدارک ممکن ہے اور دوسرےکی تدارک ناممکن۔

 

کسی مظلوم کا آنسو ظالم کو جہنم میں لے جا سکتا ہے۔

 

کامیابی کیلئے اپنی منزل کو اپنی آنکھوں سے دیکھنا اور وہاں تک اپنے قدموں سے چل کر جانا ضروری ہے۔ محمد اجمل خان

 

ہمارا رب کتنا رحیم و کریم ہے کہ کوئی بھی دکھ، درد یا پریشانی ہمیشہ رہنے نہیں دیتا یہاں تک کہ بوڑھا ہو جانے پر اپنے پاس بلا لیتا ہے۔ محمد اجمل خان

 

بھونکتا کتا سوئے ہوئے شیر سے بہتر ہے۔
مسلمانوں کے شیر( حکمران) ابھی سوئے ہوئے ہیں۔