ان واقعات کو دہراتے ہوئے ہم مینار کی پہلی دو منزلوں سے آگے نکل آئے. مینار کی دوسری اور تیسری منزل کے درمیان فاصلہ بہت زیادہ ہے. ساتھی تھک گئے اور تھوڑی دیر کے لیے گفتگو بھی بند ہو گئی. ہر سیڑھی پر یہ سوال دل میں اٹھتا کہ کب تک یونہی چڑھتے جائیں گے, کیوں نہ اسی جگہ ٹھہر کر دم لے لیں. اتنے میں ایک ساتھی نے سیڑھیوں کی چھت سے لٹکے دو چار پرندے دیکھ لیے, کہنے لگے یہ کیا ہے, عرض کیا یہ پرندا ہر مینار میں بسیرا کرتا ہے. انہیں دن میں کچھ نظر نہیں آتا اور ویسے بھی الٹا لٹکا رہنے کی وجہ سے انہیں ہر چیز الٹی نظر آتی ہے. ساتھی کہنے لگے, ان کا قصہ چھوڑو اور یہ بتاؤ کہ خود مسلمانوں نے اس تحریک کی کتنی مخالفت کی. (مصنف کے جملے اور پرندے کی مخالفین سے معنویت خیزی ملاحظہ ہو.)

میں نے کہا, یہ مخالفت کا تیسرا رخ تھا. مندر اور کلیسا کے بعد کچھ مخالفت ڈیڑھ اینٹ کی مسجدوں سے بھی ہوئی تھی. ان مسجدوں میں قوم پرست اذان تو دیتے تھے مگر وہاں جماعت اور نماز کا کوئی انتظام نہ تھا. ایک قوم پرست مسلمان وزیرِ اعظم کے بارے میں کہا جاتا ہے کہ ان کو جتنا ایمان گاندھی پر تھا اگر اسی قدر خدا پر ہوتا تو ولی ہوتے. ایک اور صوبے میں وہاں کے مسلمان وزیرِ اعظم کے بارے میں یہی بات انگریزوں کے حوالے سے کہی جاتی تھی. علماء کا ایک قافلہ بھی راہ میں بھٹک گیا. شورِ ناقوس میں وہ بانگِ درا سے نا آشنا رہے. آزادی سے چار ماہ قبل کُل ہند مسلم مجلس نے اینٹی پاکستان کانفرنس منعقد کی. پاکستان کے قیام سے تین ماہ پہلے جمیعتہ العلماء ہند کے صدر نے قائدِ اعظم کو لکھا کہ تمام مسلمان جماعتوں کا ایک جلسہ ہونا چاہیے تاکہ یہ طے کیا جا سکے کہ مسلمانوں کا مطالبہ کیا ہے. قائدِ اعظم نے کہا کہ آپ لیگ میں شامل ہو جائیں مطالبہ خود بخود آپ کی سمجھ میں آ جائے گا.

اقتباس: آوازِ دوست
مصنف: استاذِ محترم جناب مختار مسعود صاحب

 

بہت ہی اچھا اقتباس ہے