مرزا غالب کے انتقال کی خبر سب سے پہلے دہلی کے اکمل الاخبار میں شائع ہوئی تھی اور پھر سارے ملک میں پھیل گئی تھی۔۔۔ یہ خبر غالب کے انتقال کی بھی تھی اور ان کے حضور خراجِ عقیدت بھی ! ذیل میں یہ پوری خبر مع عنوان دی جارہی ہے۔۔۔ ۔اس سے صرف غالب کی شاعرانہ عظمت کا ہی اندازہ نہیں ہوگا بلکہ یہ بھی معلوم ہو سکے گا کہ اُس زمانہ کے اُردو اخبارات کی زبان کتنی مرصع، شُستہ اور مخلص ہوا کرتی تھی۔۔۔
(ماخوز از شبستاں ڈائجسٹ، دہلی)


غالب کی وفات
انا للہ وانا الیہ راجعون​

فعال اِس زمانہ غدّارے، آہ روزگار ناہنجارے! ہر روز نیا رنگ دکھاتا ہے، ہر دم دامِ غم میں‌پھنساتا ہے۔۔اِس محیط آفت کی موج بلاخیز ہے، اس وادیء ہولناک کی ہوا فتنہ انگیز ہے، اس کا آب سراب، اس کی راحت جزوِجراحت، اس کی رافت سرمایہء صداقت، اس کی شکر زہر آلود، اس کی امید آرزوئے فرسودہ۔ ہر روز محل حیات کو صرصرِ ممات سے گراتا ہے، ہر دم محفلِ سرور سے صدائے ماتم اٹھاتا ہے۔ پھول اِدھر کھلا، اُدھر گر پڑا۔ لالہ لباسِ رنگین میں یہی داغ دل پر رکھتا ہے۔ غنچہ خونِ جگر سر پرورش پاتا ہے۔ بلبل نوحہ گِر چمن ہے اور مرغ سحر خواں اسیر محن!

کیا عجب گر آسماں درپےء آزار ہے۔۔ بھلا اس سے کی توقعِ آسودگی جس کا خود گردش پر مدار ہے۔ دیکھو بیٹھے بٹھائے کیا آفت اٹھائی ہے، کس منتخبِ روزگار کی جدائی دکھائی ہے۔ نخل برومند سے معانی کو بادِ خزاں سے گرایا، مہر سپہرِ سخن دانی کو خاک میں ملایا۔۔۔ جو خسرو کے بعد ملکِ سخن کا خسروِ مالکِ رقاب تھا۔۔۔ ۔

اس کا نامہء عمر طے ہوا۔۔۔ جو میدان سخنوری کا شہسوار مالکِ رقاب تھا اس کارخش زندگی پے ہوا۔۔۔ اب حضرت کی کن کن خوبیوں کا ذکر کیا جائے۔۔۔ ۔دریا کوزے میں کیوں کر سمائے۔۔۔ ۔حسنِ خلق میں اخلاق کی کتاب، عمیم الاشفاقی میں لاجواب، خوبیء تحریر میں بے نظیر۔۔۔ صافی ضمیر، جادو تقریر۔۔۔ فارسی زبان میں لاثانی، اردوئے معلٰی کے بانی۔۔افسوس جس کا شہبازِ خیال طائرِ سدرہ شکار ہو۔۔۔ وہ پنجہء گرگ اجل میں‌گرفتار ہو۔۔۔ ۔اس غم سے سب کی حالت تباہ ہے۔۔روز یہی اس مصیب میں سیاہ ہے۔۔۔ ۔اب توضیحِ اجمال و تشکیل مقال ہے۔۔واضع ہو کہ جناب مرحوم دو تین مہینے سے صاحب فراش رہے۔۔۔ ضعف و نقاہت کے صدمے سہے۔۔آٹھ دن انتقال سے پہلے کھانا پینا ترک فرمایا۔۔۔ اس دنیائے فانی سے بالکل دل اٹھایا، تا آنکہ 15 فروری 1869ء روز دو شنبہ دوپہر ڈھلے اس خورشید اوجِ فضل و کمال کا زوال ہوا۔۔۔ ۔

 

برِ صغیر کے عظیم شاعر نوشہ مرزا اسد اللہ خان غالب خدمت میں انکی برسی کے موقع پر ایک چھوٹا سا نذرانہء عقیدت انکی نذر............!!!

 

عجب بات ہے کہ اتنے عرصہ تک محترمہ بینا کی یہ پوسٹ میری نظروں سے اوجھل رہی۔ ایک عظیم شاعر کے عین شایانِ شان۔ شکریہ محترمہ بینا

 

اس مضمون کی پسندیدگی کے لئے ممنونم @عمراعظم بھائی

اس عظیم مرد قلندر کی شان میں ہم کیا کہہ سکتے ہیں ان کی شایانِ شان الفاظ نہیں ہیں اور جو اس تحریر میں لکھا گیا۔۔۔۔۔

حق تو یوں ہے کہ حق ادا نہ ہوا

 

شکر ہے کہ استادِ سخن آج کے دور میں نہیں تھے۔۔۔لیکن انکے معاصرین نے بھی انکی قدر دانی نہ کی ۔

 

آپکی بات بھی ایک لحاظ سے درست ہے @تجمل حسین

ہر شاخ پہ الو بیٹھا ہے، انجام گلستاں کیا ہوگا