سالِ نو ایک استعارہ ہے
وقت ہر ایک سا ہمارا ہے

سال ہوتے ہیں موسموں کی طرح
ہمیں سب موسموں نے مارا ہے

وقت نے صرف پلک ہے جھپکی
آنکھ میں ہو بہو نظارہ ہے

خامشی میں وہی تعفن اک
گفتگو میں وہی غبارا ہے

حال بگڑا ہے اور بھی اپنا
ہم نے جتنا اسے سنوارا ہے

اپنے سائے کے ساتھ چلتے رہے
اور سمجھتے رہے تمہارا ہے

ہر نیا سال، سال بھر ہم نے
بس تری آس میں گزارا ہے

جو محبت کرے وہی جانے
اس میں اک مستقل خسارہ ہے

زندگی ہم خرید بیٹھے تھے
قرض ہر سانس نے اتارا ہے

کیا مناوں میں سالِ نو ابرک
جب وہی سال پھر دوبارا ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔اتباف ابرک