دے تبسم کی خیرات ماحول کو، ہم کو درکار ہے روشنی یا نبیؐ
ایک شیریں جھلک، ایک نوریں ڈھلک، تلخ و تاریک ہے زندگی یا نبیؐ

اے نویدِ مسیحا تیری قوم کا، حال عیسیٰ ؑ کی بھیڑوں سے ابتر ہوا
اس کے کمزور اور بے ہنر ہاتھ سے، چھین لی چرخ نے برتری یانبیؐ

کام ہم نے رکھا صرف اذکار سے، تیری تعلیم اپنائی اغیار نے
حشر میں منہ دکھائیں گے کیسے تجھے، ہم سے نا کردہ کار امتی انبیؐ

سچ میرے دور میں جرم ہے عیب ہے، جھوٹ فنِ عظیم آج لاریب ہے
ایک اعزاز ہے جہل و بے رہروی، ایک آزار ہے آگہی یانبیؐ

رازداں اس جہاں میں بناؤں کسے، روح کا زخم جا کر دکھاؤں کسے
غیر کے سامنے کیوں تماشا بنوں، کیوں کروں دوستوں کو دکھی یا نبیؐ

روح ویران ہے، آنکھ حیران ہے، ایک بحران تھا، ایک بحران ہے
گلشنوں شہروں قریوں پہ ہے پر فشا، ایک گھمبیر افسردگی یانبیؐ

زیست کے تپتے صحرا پہ شاہِ عرب ً، تیرے اکرام کا ابر برسے گا کب
کب ہری ہو گی شاخِ تمناّ میری، کب مٹے گی میری تشنگی یا نبیً

یانبی ً اب تو آشوبِ حالات نے، تیری یادوں کے چہرے بھی دھندلادئیے
دیکھ لے تیرے تائب کی نغمہ گری، بنتی جاتی ہے نوحہ گری یانبیؐ


کلام: حضرت سیدّنا عبدالحفیظ تائب رحمتہ اللہ تعالیٰ علیہ

 

بہت اعلیٰ کلام۔۔۔۔۔