.
قابل احترام،ملک الشعراء حضرت مولوی لطف علی اسلام و علیکم.
.
سلام دے بعد عرض اے اساں سارے ٹھیک ھیں امید اے تہاں وی خوش وسدے پے ھوسو.سئیں تازہ حال ایہ ھے جو رات پاکستان کرکٹ دا میچ ھر گئے اساں ڈاڈھے ارمانی ھیں.رات ساڈے گھر ارمان توں روٹی نی پکی سویرے چاہ پاپے دا ناشتہ کیتم.ھن بکھ توں لولھ پئے پمدن.
سئیں تہاں اقبال سوکھڑی تے قیس فریدی کوں سڈوایا ھا .قیس تاں ڈھیر لوکیں دا قرضہ ڈیونڑاں ھے نئیں آسگدا البتہ سوکھڑی دے بال خود میکوں آکھیے جو ابے کوں مشاعرے دے بہانے دب ونجو.اساں ایہ سوچیا جو احمد خان طارق کوں وی سوکھڑی نال روانہ کریندوں سفر اچ الاؤ گلاؤ رھسن.ایہ سنڑ تے امان اللہ ارشد،اشتر اتے شاکر شجاع آبادی ڈوھڑے دی پگ دی وراثت کیتے چوتا چا کڈھیا.اتنے لڑین جو ڈھائی وگھے برسین داپھ رکھیے نیں.اوڑک اساں مسیت اچ اعلان کیتے جو احمد خان نئیں ویندا ھر کوئی آپنڑے آپنڑے گھر ونجے تاں ونج تے چپ تھئی اے.
سئیں اگلے جہان دا ھک پیغام اے،حضرت علی حیدر ملتانی کنوں تاں پچھ ڈیو جو او سرائیکی شاعر ھن یا پنجابی.عوام تاں انہاں دا سارا کلام مفہوم سمیت بدلی ویندی ھے.میکوں ڈر ھے کجھ عرصہ بعد علی حیدر دا پشتو کلام وی سامنڑے نہ آونجے.
سئیں ھک گذارش بئی وی ھئی..اتھاں فیس بک آلی مخلوق کوں تاں کوئی ایجھا ڈیکھالا کراؤ جو او شاعری کوں نیک کم سمجھ تے ڈھیر کمنٹ ڈتا کرن.اساں شاعریں کوں دنیا تے مشاعریں دی فیس تے واہ واہ دے سوا بیا مخلوق توں وصول ھی کیا تھیندے.اساں تاں او لوک ھیں جنہاں توں کاں وی نئیں ڈردے ھشاوا ڈیوں تاں مونڈھے تے وٹھ مار ویندن.
سئیں خط دا جواب دیر نال ڈیونڑ تے معزرت چاھنداں.اصل اچ کجھ ڈینھ پہلے جہانگیر مخلص کوں خط ڈے روانہ کیتم .اوں غریب کوں تاں پہلے ٹول پلازے کنے فرشتیں روک گھدے .جو پچھن اگوں بتاں ڈیونڑ پئے ونجے انہاں آکھیے طالبان ھے شاید. تلاشی کرنڑ تے خط پکریج پے ول نامہ اعمال جو چوایا گے جوان دیاں 35000نمازاں کھوٹل ھن .میکوں تاں ڈسیندیں کھل آمدی اے مخلص سئیں جوتی اتھائیں لہا تے بھنے بہاولپور صحیح آن کڈیس..اج ولا غیور بخاری تے امرت جوگی کوں راکٹ تے بلہا تے بھجیندا پیاں .ایہ زمین سیارے دے باھر رک ویسن فرشتے بھیج تے خط وصول کرگھنو .جواب ول کہیں فرشتے دے ہتھ پٹھیجو او میڈی سراندی رکھ ویسے .امید ھے ایہ قلمی دوستی میڈے جیندیں توڑیں قائم راھسے.وسدے رھو سئیں.وسلام
.
تہاڈی اٹھارویں پیڑھی وچوں پیدا تھیون آلے جوان مولوی فدا حسیں دا جگری یار شعیب نواز جتوئی ڈاکخانہ خاص کوٹلہ پٹھان تحصیل خانپور ضلع رحیم یار خان.

 

@نیرنگ خیال توجہ کی منتظر پوسٹ

 

اوکھا کم اے