ابتداء میں اب تک کی گفتگو کا احاطہ کرنا چاہوں گا تا کہ میری گذارشات کو سمجھنے میں آسانی رہے۔
میرے بھائی @عمادعاشق نے روزمرہ زندگی کے کچھ واقعات سے اتنا اثر لیا کہ انہیں ایک تحریک کی بنیاد رکھنے کی ضرورت محسوس ہوئی۔اُن واقعات میں روزہ کی حالت میں ایک بزرگ کو خواتین کی جانب سے سیٹ دینے سے انکار، ایک لڑکی کا اپنے والد اور بھائیوں سے زدوکوب کرواکر ہسپتال پہنچا دینا۔ ملازمتوں میں خواتین کو ترجیح دینا۔ عماد عاشق صاحب کے ایک جید اُستاد کو ملازمت نہ ملنا۔۔۔۔ تحریک کے اغراض و مقاصد مندرجہ ذیل بیان ہوئے:
1۔ مردوں کو زیادہ تعداد میں نوکریاں دی جائیں۔
2۔ شعبہء طب میں عورتوں کے مقابلے میں مردوں کو زیادہ موقع فراہم کئے جائیں۔
3۔خواتین کو ایسے شعبہ جات میں ملازمت نہ دی جائے جہاں اُن کو نسوانیت داؤ پر لگ جائے۔
اس کے بعد تبصروں اور تعریف و تنقید کا طوفان اُٹھا۔جس میں کئی مثبت باتیں سامنے آئیں اور کچھ انتہائی نامناسب۔
--------------------------------------------------------------------
عماد عاشق بھائی نے اپنی تحریک کی حمایت میں چند ایسی دلیلیں بھی دیں جن پر غور وفکر ضرور کیا جانا چاہیے تھا۔مثلا" اُن کا یہ کہنا کہ ہمارے معاشرے میں مذہبی اور معاشرتی لحاظ سے مرد کواپنے کنبے کا مکلف اور سربراہ بنایا گیا ہے لہذا اُسےاپنی انہی ذمہ داریوں کی تکمیل کے لئے خواتین سے زیادہ ملازمتوں کی ضرورت رہتی ہے۔
میں یقینا" اس بات کی حمایت کروں گا۔ البتہ ساتھ ہی یہ عرض کرنا بھی ضروری سمجھتا ہوں کہ اُن خواتین کو جو اپنی تعلیم اور صلاحیتوں کی بنیاد پر ملازمت کی حقدار ٹھہریں انہیں بھی مایوس نہ کیا جائے۔نیز ایسی خواتین کو جو کسی وجہ سے اپنے کنبے کی مکلف بن گئی ہوں اُنہیں ضرور ترجیح دی جائے۔
یہاں یہ بات بھی قابلِ غور ہے کہ دنیا میں جتنی بھی قوموں نے ترقی کی اُن میں خواتین کا حصہ تقریبا" مساوی تھا ۔ ایک اور بات جو توجہ کی متقاضی ہے یہ بھی ہے کہ ہم حقوق کے معاملے میں تو مغرب کو اپنا آئیڈیل بناتے ہیں لیکن فرائض کے معاملے میں کبھی مذہب کو ڈھال کے طور پر استعمال کرتے ہیں تو کبھی علاقے اور معاشرے کے رسوم و رواج کو نا انصافی کے فروغ کے لئے۔ گویا ہم آدھے تیتر اور آدھے بٹیر ہی بنے رہنا چاہتے ہیں۔
در حقیقت ہمارے ملک کا سب سے بڑا مسئلہ یہ ہے کہ آبادی کے تناسب سے ملازمتوں کے مواقعوں میں اضافہ نہیں ہو سکا۔ وجوہات میں اربابِ اختیار کی بے حسی،سیاست،خود غرضی،جھوٹ ،فریب، لوٹ مار،قانون اور احکاماتِ الٰہی سے رو گردانی شامل ہیں۔ اسی روش کا شاخسانہ ہے کہ کثیر تعداد میں انسان غیر انسانی زندگی گزارنے پر مجبور ہیں۔ایک مخصوص طبقے نے وسائل کو کچھ اس طرح اپنے شکنجے میں جکڑ لیا ہے کہ اُن کے کتوں کی دیکھ بھال پر جتنے اخراجات آتے ہیں اُن سے کئی غریب خاندان با آسانی پل سکتے ہیں۔ایسا اُس وقت تک ہوتا رہے گا جب تک غریب اُن کے مکرو فریب کا ایندھن بنتا رہے گا۔ غربت اور جہالت ہی ہمارے ملک کے اصل دشمن ہیں۔ ایک اور تلخ حقیقت یہ بھی ہے کہ ہمیں رفتہ رفتہ کاہل اور کام چور بنایا جاتا رہا ہے۔کچھ اللہ کے بندوں کو چھوڑ کر با اختیا ر لوگوں کے بارے میں با آسانی یہ کہا جا سکتا ہے کہ ان میں سے امین وہی ہے جسے خیانت کا موقع نہ ملا ہو۔
ایسی صورتِ حال میں اصلاح کی ذمہ داری جن لوگوں پر عائد ہوتی ہے اُنہوں نے تو اپنی الگ ہی دنیا بنا لی ہے۔معروف کالم نگار جاوید چوہدری نے غالبا" انہی لوگوں کے لئےلکھا تھا "دل میں بغض،پیٹ میں حرام اور طواف پہ طواف۔۔ کعبہ خود چکر میں ہے کہ یہ لوگ کس چکر میں ہیں۔"
تو کیا دنیا یہاں ختم ہو گئی ہے۔ میرے خیال سے ہمارے مسائل کی کنجی ہمارے اتفاق و اتحاد میں ہے۔ہمیں چاہئے کہ آپس میں دست وگریباں ہونے کی بجائے اپنی کمزوریوں کو طاقت میں بدلنے کی کوشش کریں۔ مثال کے طور پر خواتین ایسی گھریلو صنعتوں میں دلچسپی لیں جہاں وہ اپنے اور اپنی جیسی دوسری بہنوں کے لئے ذرائع معاش مہیا کر سکیں۔ میری گزارش ہے کہ اس نقطہ کو پیشِ نظر رکھتے ہوئے اپنی تجاویز سے آگاہ فرمائیں کہ کس طرح اس صورتِ حال میں کچھ کر کے ہم اپنی ،اپنے بہن بھائیوں، اپنے معاشرے اور اپنے ملک کی خدمت کر سکتے ہیں۔
آخر میں کچھ تبصرہ مراسلوں پر:
ایک صاحب نے خواتین کے تعلیم کے حصول کو غیر ضروری قرار دیا۔۔۔۔۔ عرض ہے کہ رسول اللہﷺ پر پہلی وحی میں ہی علم کے حصول کا حکم،قلم کی اہمیت اور اُن باتوں کو سکھانے کی بات کی گئی تھی جو انسان نہیں جانتا تھا۔۔۔۔۔۔ علم کو زن و مرد،دونوں پر فرض قرار دیا گیا۔ میرے خیال سے تو عورت کا علم حاصل کرنا مرد کے مقابلے میں زیادہ اہم اور ضروری ہے کہ مر د کو تو اپنے کنبے کا مکلف بنایا گیا ہے جبکہ تعلیم یافتہ عورت ایک باوقار قوم کے وجود کی ضامن ہوتی ہے۔اسی اہمیت کے پیشِ نظر رسول اللہ نے اپنے پاس آئے ہوئے اُن قیدیوں کی آزادی کے لئے یہ شرط رکھی کہ وہ مسلمانوں کو علم سکھائیں۔
عورتوں کے کام کرنے کے مخالفین کو معلوم ہونا چاہیئے کہ حضرت خدیجہ ایک تاجر تھیں۔رسول اللہﷺ کو شادی کی پیش کش خود اُنہوں نے کی تھی۔ جنگ خندق میں زخمی ہونے والے مجاہدین کی مرہم پٹی کرنے میں حضرت فاطمہ نے بھی حصہ لیا تھا۔مزید یہ کہ رسول اللہ ﷺ اپنی بیٹیوں تک کا اس حد تک احترام کیا کرتے تھے کہ اُن میں سے کسی کی آمد پر اُٹھ کر کھڑے ہو جاتے تھے اور اپنے کاندھے سے رومال اُتار کر اُن کے بیٹھنے کے لئےبچھا دیا کرتے تھے۔
میری بہنوں نے اپنے موقف اور دلائل کے ساتھ مردانہ وار (زنانہ وار کہیں پڑھا نہیں ہے) مقابلہ کیا۔ بینا بہن کا تبصرہ متوازن تھا جبکہ صباح بہن کہیں کہیں جذباتی نظر آئیں لیکن اس بات کا کریڈٹ بھی انہی کو جاتا ہے کہ اُنہوں نے بلآخر @عمادعاشق صا حب سے مکمل اتفاق کا اعلان کیا۔ اس طرح اُنہوں نے وسعتِ قلبی اور وسعتِ نظرکا مظاہرہ کیا۔
جوگی بھائی،زبیر بھائی،بابا جی اور عبدالرزاق بھائی کے تبصرے بھی خوب تھے۔ خصوصا" عبدالرزاق قادری بھائی کے اُس مضمون نے بہت متاثر کیا جس میں یہ جملہ بڑا با اثر تھا " بچی پیدا بعد میں ہوتی ہے ماتم پہلے شروع ہو جاتا ہے۔"۔
میری سب سے التجا یہ رہے گی کہ صحت مند تبصرے اور اختلاف ضرور کریں لیکن تلخی اور کدورت کو اپنے درمیان جگہ نہ دیں۔اس بات کو مدِ نظر رکھیں "لوگوں کی مذمت کرنے سے پہلے ہمیں اُنہیں سمجھنے کی کوشش کرنا چاہیئے۔ہمیں یہ جاننا چاہیئے کہ جو کچھ وہ کرتے ہیں ۔کیوں کرتے ہیں۔ یہ بات نکتہ چینی کی بہ نسبت زیادہ مفید اور خوشگوار ہے اور اس سےہمدردی،بُرد باری اور شفقت پیدا ہوتی ہے۔سب کو جاننا سب کو معاف کر دینے کے مترادف ہوتا ہے"
والسلام۔ طالبِ دعا۔۔ عمراعظم

 

شکریہ عماد عاشق بھائی۔ اللہ اچھی صحت کے ساتھ آپ کو ہمیشہ خوش رکھے۔آمین

 

عمراعظم بھائی نے بہت خوبصورت بات کی اور ہمیں گفتگو کا بہترین سلیقہ سکھایا ۔
جزاک اللہ عمر بھائی

 

واقعی عمراعظم بھائی کسی چیز کو دیکھنے کا انداز مختلف لوگوں کابالکل ہی مختلف ہوتا ہے دیکھ کر پرکھنا اور پھر اس پر اس طرح کی گفتگو کرنا ہر ایک کا خاصہ نہیں ہوتا۔۔۔۔وہی الفاظ ہوتے ہیں لیکن لڑی میں کس طرح پرونا ہے ہر کوئی نہیں جانتا۔آج ہمارے بھائی@عماد عاشق کو یہ لڑی شروع کرنے کا پھل مل گیا ہو گا۔
آپ کی تجویز پر آگے بڑھتے ہیں کہ مسائل کے حل پر بات کرتے ہیں۔ خواتین کن شعبوں میں کام کر سکتی ہیں۔۔۔؟ آپ نے اکثر دیکھا ہو گا کہ خواتین بہترین ڈیزائنر ہوتی ہیں،ڈیزائن کو کاپی بھی خوب کرتی ہیں میری مرادگاؤں میں کڑھائی وغیرہ کرنے والی خواتین ہیں۔
اس کو جدت دی جا سکتی ہے۔
آج کمپیوٹر انٹرنیٹ کے ذریعے اگر انہی ڈیزائنر صلاحیتوں کو بروئے کار لاتے ہوئے گرافکس ڈیزائننگ ویب ڈیزائننگ وغیرہ پر کام کیا جائے تو گھر بیٹھے خواتین ڈالروں کی نہریں گھر کی طرف موڑ سکتی ہیں۔

 

@تجمل حسین نے اس لڑی کا جائزہ نہیں لیا نا؟؟